Presidenti i Kosovës, Hashim Thaçi ka organizuar pritje shtetërore në nder të 12 vjetorit të Pavarësisë së Kosovës.

Ne fjalimin e mbajtur para shumë të pranishmeve, i pari i vendit tha se të gjithë këto vite liri e pavarësi i dedikohen atyre qe kontribuuan me se shumti, shkruan arbresh.info.

“Kaluan 21 vite që Kosova e fitoj lirinë dhe 12 vite me pavarësi. Edhe liria edhe pavarësia u krijuan me mund e sakrificë, është meritë e secilit që kontribuuan që të vijmë në këtë ditë. Sot në 12 vjetorin e Pavarësisë, Kosova është e konsoliduar në rrafshin ndërkombëtar, sapo kaluam zgjedhjet që ishin shembull për rajonin”, tha ai.

E si shumë herë të tjetra, as kësaj radhe ai nuk la pa përmendur liberalizimin e vizave dhe anëtarësimi në NATO.

“Kosova është e njohur nga më shumë se 100 shtete, e anëtarësuar në më shumë se 200 organizata. Para nesh është një obligim që Kosovës t’i liberalizohen sa më shpejtë vizat, objektivë e gjithë neve është që të jemi sa më shpejtë pjesë e NATO-s”, tha Thaçi.

Thaçi po ashtu u shpreh falënderues për kontributin e ShBA-së, BE dhe NATO-së.

“Dua t’i falënderoj për kontribut ShBA-në, BE dhe NATO-në. Jemi evropianët më të ri në botë dhe besoj se e meritojmë që të jemi sa më shpejtë pjesë e NATO-s. Jemi popullata më pro evropiane dhe pro amerikane në botë”, tha Thaçi./arbresh.info/